Bəhruz Kəngərli adına Sərgi Salonunda Naxçıvanda ilk dəfə olaraq "I Art Batlle"-"I İncəsənət döyüşü" adlı müsabiqənin qaliblərinin mükafatlandırma mərasimi keçirilmişdir.

5 aprel 2019-cu il tarixdə Bəhruz Kəngərli adına Sərgi Salonunda Naxçıvanda ilk dəfə olaraq "I Art Batlle"-"I İncəsənət döyüşü" adlı müsabiqənin qaliblərinin mükafatlandırma mərasimi keçirilmişdir. “Art Batlle” ın gənc rəssamlar arasında keçirilməsində məqsəd gənclərin asudə vaxtlarının səmərəli keçirilməsi, gənc istedadların üzə çıxarılması və tanıdılması, onlar arasında sağlam rəqabətin yaradılmasıdır. Tədbiri giriş sözü ilə millət vəkili, Rəssamlar Birliyinin sədri Ülviyyə Həmzəyeva açaraq keçirilən tədbirin mahiyyəti, həmçinin bu cür müsabiqələrin keçirilməsinin gənclərin istedadlarının üzə çıxarılmasında, onların fəaliyyətlərinin qiymətləndirilməsində mühüm addım olduğunu bildirmişdir. Sonra Gənclər Fondunun icraçı direktoru Cəbi Quliyev, Gənclər və İdman Nazirliyininin şöbə müdiri Tahir Məmmədli, Azərbaycan Respublikasının əməkdar rəssamı Telman Abdinov, Naxçıvan Muxtar Respublikasının əməkdar rəssamları Məhəmmədəli Ələkbərov və Əli Səfərli çıxış edərək muxtar respulikada gənclərə göstərilən dövlət qayğısı, onlar üçün yardılmış şərait barədə məlumat vermiş və bildirmişlər ki, müsabiqədə iştirak edən gənclər öz bacarıqlarını, istedadlarını nümayiş etdirməklə yanaşı asudə vaxtlarınıda səmərəli təşkil etmişlər. Gələcəkdə də keçiriləcək bu tipli müsabiqələrdə gəncləri fəal iştirak etməyə çağırmış və qalibləri təbrik etmişlər. Qeyd edək ki, müsabiqənin ilkin mərhələsi 4 aprel 2019-cu il tarixdə açıq səma altında-Bəhruz Kəngərli adına Rəssamlar Parkında 20 nəfər gənc rəssamın iştirakı ilə keçirilmişdir. Günün sonunda təyin edilmiş münsiflər heyətinin və Naxçıvan şəhər sakinlərinin verdikləri səslərə əsasən qaliblər müəyyən edilmişdir. Belə ki, Naxçıvan Müəllimlər İnstitutunun tələbəsi Rəcəbov Mikayıl, Naxçıvan Dövlət Texniki Kollecinin tələbəsi Bəylərova Həcər I yerə, Naxçıvan Müəllimlər İnstitutunun tələbəsi Hacıyev Çinar, “Naxçıvan” Universitetinin tələbəsi Xudiyev Cəlil II yerə, Naxçıvan Dövlət Universitetinin tələbələri Aslanov Nihad, Kazımlı Könül III yerə layiq görülmüşlər. Qaliblərə həmçinin müsabiqədə iştirak edən digər iştirakçılara təşkilatçılar tərəfindən diplom və fəxri fərmanlar təqdim olunmuşdur. Müsabiqə Naxçıvan Rəssamlar Birliyinin, Gənclər və İdman Nazirliyinin, Gənclər Fondunun birgə təşkilatçılığı ilə keçirilmişdir.