Naxçıvan Muxtar Respublikasının “Əməkdar rəssam”ı Leyla Əzimbəyovanın “Fərqli olaraq” adlı fərdi yaradıcılıq sərgisi açılıb

Yanvarın 14-də Naxçıvan Muxtar Respublikası Rəssamlar Birliyinin Bəhruz Kəngərli adına Sərgi salonunda Naxçıvan Muxtar Respublikasının Əməkdar rəssamı Leyla Əzimbəyovanın “Fərqli Olaraq” adlı fərdi yaradıcılıq sərgisi açılıb.

Naxçıvan Muxtar Respublikası Ali Məclisinin Sədri Vasif Talıbov sərginin açılışında iştirak edib.

Naxçıvan Muxtar Respublikası Rəssamlar Birliyinin sədri, Azərbaycan Respublikasının Əməkdar rəssamı Ülviyyə Həmzəyeva çıxış edərək deyib ki, Naxçıvan Muxtar Respublikası Rəssamlar Birliyinin fəaliyyəti üçün hərtərəfli şərait yaradılıb. Naxçıvan Muxtar Respublikası Ali Məclisinin Sədrinin sərəncamları ilə Rəssamlar Birliyinin 40 və 50 illik yubileyləri qeyd olunub, yeni bina istifadəyə verilib. Bütün bunlar göstərilən qayğının ifadəsi olmaqla yanaşı, həm də muxtar respublika rəssamlarının məsuliyyətini daha da artırır. Bu günədək keçirilən “Naxçıvan-bəşəriyyətin beşiyi” Beynəlxalq Rəsm Festivallarında ümumilikdə 36 ölkədən 250-yə yaxın rəssam iştirak edib. Təbii ki, bu da Naxçıvanda sənətə verilən dəyərin daha bir ifadəsidir. Sevindirici haldır ki, bu gün Naxçıvan rəssamlıq məktəbində varislik təmin olunub, gənc və istedadlı rəssamlar yetişib, onların yaradıcılığı hərtərəfli stimullaşdırılıb. Hər il Rəssamlar Birliyində onlarla sərgi açılır, yüzlərlə yeni əsər nümayiş etdirilir. Naxçıvan Muxtar Respublikasının “Əməkdar rəssamı” Leyla Əzimbəyovanın “Fərqli olaraq” adlı sərgisi də bu qəbil sərgilərdəndir. Rəssamın əsərləri özünəməxsus üslubda yaradılıb. O, bizim gözümüzlə gördüyümüz, məişətdə istifadə etdiyimiz əşyaları natürmortlarında öz baxış prizmasından, dərin məzmun çalarları ilə nümayiş etdirir. Rəssamın əsərlərində cəsarətli rəng seçimi və hökmranlıq edən güclü fırça zərbələri müşahidə edilir. Leyla Əzimbəyovanın yaradıcılığında "Kuklalar" , "O vaxtkı toylar", " Bu günkü toylar", "Sərvər", "Güləndam" və bu qəbildən əsərləri sırf özünə məxsus tərzdə yaradılmış əsərlərdəndir.

Sonda, Naxçıvan Rəssamlar Birliyinin üzvləri Sədrimizi doğum günü münasibətilə təbrik etmiş, xatirə şəkli çəkdirmişlər.

Foto: Rəssamlar Birliyinin rəssam-fotoqrafı Araz Xudiyev